Punelive24.com
Latest News, Videos, Web Stories and Photos from Pune

बोगस डाॅक्टरांनी केल्या एक हजार शस्त्रक्रिया

राज्यात पदवी नसलेले अनेक जण रुग्णांवर उपचार करतात. भोंदूबाबाच नव्हे, तर संबंधित पदवी न घेतलेले भोंदू डाॅक्टरही रुग्णांच्या जीविताशी खेळत असतात. मुंबईत असाच एक प्रकार उघडकीस आला आहे.

मुन्नाभाई एमबीबीएसला अटक

शल्यविशारद नसताना किंवा शस्त्रक्रियेचे कोणतेही प्रशिक्षण घेतलेले नसताना दादरसारख्या ठिकाणी दवाखाना थाटून एका कथित एमबीबीएस डॉक्टरने जवळपास मुळव्याधीच्या एक हजार शस्त्रक्रिया केल्याचा धक्कादायक प्रकार समोर आला आहे.

एका टॅक्सीचालकावरील अयशस्वी शस्त्रक्रियेनंतर त्याचा हा कारनामा उघडकीस आला. माटुंगा पोलिसांनी सर्वसामान्य नागरिकांची फसवणूक आणि त्याच्या जीवाशी खेळणाऱ्या डॉक्टर एस. मुकेश कोटा याला अटक केली आहे.

Advertisement

मुंबईभर फलक

गोरेगाव येथे राहणारा एका टॅक्सीचालक मूळव्याधीच्या त्रासाने हैराण झाला होता. यावर उपचार करण्यासाठी डॉक्टरची शोधाशोध सुरू असतानाच त्याला इतर टॅक्सीचालकांनी दादर टी. टी. येथील गोपालराव पाईल्स सेंटरबाबत सांगितले.

याबाबत टॅक्सीचालकाने अधिक माहिती घेतली असता मुंबईत ठिकठिकाणी या क्लिनिकचे ‘मूळव्याधीवर विनाशस्त्रक्रिया उपचार’ असे फलक झळकत असल्याचे दिसून आले.

टॅक्सीचालकाच्या बेतले जीवावर

टॅक्सीचालकाने २० फेब्रुवारी रोजी पत्नीसह हे क्लिनिक गाठले. एकदा ड्रेसिंग करून डॉक्टर एस. मुकेश कोटा यांनी दुसऱ्या दिवशी येण्यास सांगितले. दुसऱ्या दिवशी क्लिनिकमध्ये गेल्यानंतर छोटीशी शस्त्रक्रिया करावी लागेल असे सांगून कोटा यांनी काही अवधीत शस्त्रक्रिया उरकली आणि २५ हजार रुपये टॅक्सीचालकाकडून घेतले.

Advertisement

पत्नीसोबत टॅक्सीने घरी जात असताना शस्त्रक्रिया केलेल्या ठिकाणाहून मोठ्या प्रमाणात रक्तस्त्राव होऊ लागला. टॅक्सीचालकाचे कपडे, टॅक्सीची सीट रक्ताने माखली आणि यामुळे तो बेशुद्ध पडला. पत्नीने टॅक्सी केईएम रुग्णालयात नेऊन पतीला दाखल केले.

कायमचे अपंगत्व

केईएम रुग्णालयातून उपचार घेऊन बाहेर पडल्यानंतर टॅक्सीचालकाने माटुंगा पोलिस ठाण्यात तक्रार केली. डाॅ. कोटा यांनी केलेल्या चुकीच्या उपचारामुळे मलविसर्जनावरील नियंत्रण सुटल्याने डायपर वापरावे लागते.

अयशस्वी शस्त्रक्रियेमुळे वाहनही चालविण्यास बसता येत नसल्याने उदरनिर्वाह करता येत नसल्याचे टॅक्सीचालकाने तक्रारीत म्हटले होते. पोलिसांनी कोटा याला अटक करून चौकशी केली असता त्याने गेल्या तीन वर्षात जवळपास एक हजार शस्त्रक्रिया केल्याची माहिती दिली.

Advertisement

समितीच्या अहवालानंतर कारवाई

तक्रारीनंतर पोलिसांनी डॉ. कोटा यांच्या पदवी संदर्भातील कागदपत्र महाराष्ट्र वैद्यकीय परिषद तसेच वैद्यकीय अधिष्ठाता, जे. जे. रुग्णालय, मुंबई यांच्याकडे पाठविण्यात आले. जे. जे. रुग्णालयामध्ये याबाबत तज्ञसमिती गठीत करण्यात आली. या समितीने २१ जून रोजी आपला अहवाल पोलिसांना सादर केला.

एमबीबीएस डॉक्टर मूळव्याध संबंधित आजारावर शस्त्रक्रिया करू शकत नाहीत. मूळव्याधावर शस्त्रक्रिया करण्याकरिता डॉक्टरने एम. एस. सर्जरी ही अतिरिक्त शैक्षणिक अर्हता धारण करणे आवश्यक आहे. डॉ. कोटा यांनी निष्काळजीपणा, हलगर्जीपणा केल्याचे अहवालात नमूद करण्यात आले.

Advertisement
Leave a comment