पुणे : जेजुरी मंदिर परिसराचा जीर्णोद्धार करताना मूळ मंदिरामध्ये बदल न होऊ देता जुन्या पद्धतीचा दृष्टिकोन समोर ठेवून विकासकामे करण्याच्या सूचना उपमुख्यमंत्री अजित पवार दिल्या. पहिल्या टप्प्यातील विकास आराखड्याला मान्यता देण्यात आली.
आढावा बैठक
विभागीय आयुक्त कार्यालयाच्या सभागृहात पवार यांच्या अध्यक्षतेखाली जेजुरी तीर्थक्षेत्र विकास आराखडा आढावा बैठक घेण्यात आली. त्या वेळी ते बोलत होते. या वेळी खासदार सुप्रिया सुळे, आमदार संजय जगताप, जिल्हाधिकारी डॉ. राजेश देशमुख व अन्य वरिष्ठ अधिकारी उपस्थित होते.
निधी उपलब्ध करून देण्याची ग्वाही
जेजुरी तीर्थक्षेत्र विकासासाठी तयार करण्यात आलेल्या 349 कोटी रुपयांच्या आराखड्यापैकी पहिल्या टप्प्यातील जतन व संवर्धन, परिसर व्यवस्थापन,
जलव्यवस्थापन आदी विकासकामांसाठी मान्यता देण्यात आली. पहिल्या टप्प्यांतील विकासकामांसाठी तातडीने निधी उपलब्ध करुन देण्याचे आश्वासन पवार यांनी दिले.
अजित पवार काय म्हणाले?
“जेजुरी गडाला सांस्कृतिक वारसा लाभलेला आहे. हे जागृत देवस्थान असून इथे राज्यातून आणि परराज्यातून लाखो भाविक दर्शनासाठी येत असतात. जेजुरीच्या वास्तूचे ऐतिहासिक महत्त्व ओळखून विकासाचे नियोजन करा.
विकास कामे करताना कमीत कमी वेळेत काम पूर्ण होईल, याची दक्षता सर्व विभांगांनी घ्यावी. विश्वस्त आणि स्थानिक लोकांना विश्वासात घेऊन सर्व विभागांनी विकासाची कामे करावीत,” असे पवार म्हणाले.
रसायनमिश्रित भंडारा विक्रेत्यावर कारवाई करा
तीर्थक्षेत्र विकासामुळे स्थानिक लोकांना रोजगार मिळेल, तसेच भाविक येण्याचे प्रमाण वाढेल. पाण्याच्या साठवण ठिकाणांची स्वच्छता करून वेगळी पाईपलाईन करून त्याचा वापर करता येईल. गडावर उधळली जाणारी हळद रसायनमिश्रीत असल्याने सर्वांच्या आरोग्यासाठी घातक आहे.
रसायनमिश्रीत भंडाऱ्याची विक्री करणाऱ्या विक्रेत्यांबाबत कठोर भूमिका घ्यावी. गडाला शोभेल अशी सीमाभिंत बांधा, पाण्याची टाकी, पदपथ, शौचालय, तलावातील गाळ काढणे, माहिती फलक इत्यादी कामांचा आढावा पवार यांनी या वेळी घेतला.
नियोजन विभागाकडून सुविधांबाबत सादरीकरण
नियोजन विभागाच्यावतीने गडाचे ऐतिहासिक महत्त्व आणि वास्तूचा इतिहास, यात्रा-उत्सव तसेच दरवर्षी गडावर येणाऱ्या भाविकांची संख्या, आपत्ती निवारण मार्गदर्शक तत्त्वे, संवर्धनासाठी मार्गदर्शक तत्त्वे, कमानी, दीपमाळा व कोटाचा बाहेरच्या भागाची वास्तुसंवर्धनाची गरज, महादरवाजे, पाणीगळती डागडुजी,
तुटलेले दगड परत बसविणे, खराब चुन्यांच्या गिलाव्याची डागडुजी, भेगा सांधणे, गडावरील झुडपे, गवत शास्त्रीय पद्धतीने काढणे, हळद व तेलाचे थर काढणे, पर्यटक/भाविकांसाठीच्या सुविधांबाबत सादरीकरणाद्वारे माहिती देण्यात आली.
