फुकट चिकन लाॅलिपाॅप घेऊन जाण्यास विरोध केल्याने गुन्हेगारांनी राडा घातला. केटरर्सचा पाठलाग करून वार करण्याचा प्रयत्न केला.

डायस प्लॉट परिसरात राडा

केटरर्सच्या दुकानातून पैसे न देता चिकन लॉलीपॉपचे संपूर्ण घमेले घेऊन जाणाऱ्या गुन्हेगाराला विरोध केल्याने, त्याने साथीदारांसह डायस प्लॉट परिसरात राडा घातला.

तसेच, आरोपींनी कोयते आणि पालघन घेऊन केटरर्सला जीवे ठार मारण्याच्या उद्देशाने त्यांचा पाठलाग करून, वार करण्याचाही प्रयत्न केला.

पाच जणांविरोधात गुन्हा

या प्रकरणी उझेर हसीन खान (वय १९, रा. डायल प्लॉट) याने स्वारगेट पोलिस ठाण्यात तक्रार दिली आहे. त्यावरून गोविंदसिंग पापुलसिंग टाक (वय २८, रा. डायस प्लॉट) याच्यासह त्याच्या पाच साथीदारांवर गुन्हा दाखल केला आहे. टाक याला स्वारगेट पोलिसांनी अटक केली आहे.

काय घडले ?

पोलिसांनी दिलेल्या माहितीनुसार, तक्रारदाराचे डायस प्लॉट येथे रब्बानी केटरर्स नावाचे दुकान येथे आहे. या ठिकाणी विक्रीसाठी बनवलेले चिकन लॉलीपॉप एका घमेल्यात ठेवण्यात आले होते. आरोपी रात्री नऊच्या सुमारास तेथे आला. त्याने लॉलीपॉपचे घमेले उचलून नेले.

त्या वेळी तक्रारदाराचे चुलते सोनू शेख यांनी त्यास विरोध केला. त्याचा राग आल्याने आरोपी टाक त्याच्या पाच साथीदारांसह कोयते आणि पालधन घेऊन काही वेळाने पुन्हा तेथे आला.

त्यांना पाहून तक्रारदार आणि त्याचा अन्य एख नातेवाइक तेथून पळू जात असताना, आरोपींनी त्यांना अडवले आणि कोयत्याने वार करण्याचा प्रयत्न केला.

त्यानंतर आरोपींनी तक्रारदाराचा पाठलाग करून त्याला जिवे ठार मारण्याचा प्रयत्न केला. या प्रकारामुळे परिसरातील पथारी व्यावसायिकांनीदेखील पळ काढला होता.