Punelive24.com
Latest News, Videos, Web Stories and Photos from Pune

बंडातात्यांवरील कारवाईनं भाजप संतापला

कोरोनाचे कारण सांगून राज्य सरकारनं पायी वारीला बंदी घातली आहे. ही बंदी मोडून वारीला पायी निघालेल्या बंडातात्या कराडकर यांना पोलिसांनी ताब्यात घेतल्यानं भाजप संतापला आहे.

वारक-याचा अपमान चुकीचा

राज्य सरकारनं घालून दिलेले नियम धुडकावून पंढरपूरच्या वारीसाठी बंडातात्या पायी निघाले होते. त्यांना पिंपरी-चिंचवड पोलिसांनी अटक केली आहे.

विरोधी पक्षनेते देवेंद्र फडणवीस त्यावर तीव्र नाराजी व्यक्त केली आहे. फडणवीस यांनी या संदर्भात एक ट्वीट केलं आहे. वारी हा महाराष्ट्राच्या संस्कृतीचा अविभाज्य घटक आहे.

विठ्ठल-वारकरी यांचे नाते अवर्णनीय असते. श्रद्धा आणि परंपरांचे एक वेगळं महत्त्व आहे. वारकऱ्यांचा असा अपमान करणं चुकीचं आहे,’ असं फडणवीस यांनी म्हटलं आहे.

मध्यम मार्ग नव्हता का?

‘बंडातात्या कराडकर यांना अटक करून सरकारनं काय साधलं? काहीच मध्यम मार्ग नव्हता?,’ असा प्रश्न त्यांनी उपस्थित केला आहे. ‘बंडातात्यांवर थेट अटकेची कारवाई करणं हे सर्वथा चुकीचं आहे. याच तीव्र निषेध करतो,’ असंही त्यांनी म्हटलं आहे.

भाजपचा हट्ट

कोरोना संसर्गाच्या पार्श्वभूमीवर मागील वर्षीप्रमाणे यंदाही राज्य सरकारनं पायी वारीला परवानगी नाकारली आहे. त्याऐवजी, मोजक्या वारकऱ्यांच्या उपस्थितीत मानाच्या पालख्या एसटी बसनं पंढरपूरला नेण्याची परवानगी दिली होती; मात्र पायी वारी व्हायलाच हवी, असा हट्ट भाजपनं धरला होता.

बंडातात्या कराडकर यांच्यासह काही वारकऱ्यांनीही भाजपच्या भूमिकेस पाठिंबा दिला होता. त्यानुसार, बंडातात्या हे आपल्या समर्थकांसह आज पायी चालत पंढरीच्या दिशेनं निघाले होते. पिंपरी-चिंचवड पोलिसांनी त्यांना पहाटेच अटक करून स्थानबद्ध केलं आहे.

त्यावरून भाजपनं सरकारवर चौफेर टीका केली आहे. मुख्यमंत्री उद्धव ठाकरे व अजित पवार यांनी परिणामांना तयार राहावं, असा इशारा भाजपच्या आध्यात्मिक समन्वय आघाडीनं दिला आहे.

बंडातात्यांची मनधरणी सुरू

बंडातात्यांनी पायी वारीचा आग्रह सोडून द्यावा यासाठी त्यांची मनधरणी सुरू असल्याचं समजतं. ‘पायी वारीबाबत बंडातात्यांनी वेगळा पर्याय सुचवला आहे.

‘मी पायी वारी केल्यामुळं गर्दी होत असेल तर मी वाहनानं पंढरीला जायला तयार आहे; मात्र माझ्या काही साधकांना पायी वारीची परवानगी द्यावी.

सुरक्षित अंतराचे नियम पाळून ते वारी करतील, असं बंडातात्यांचं म्हणणं आहे, अशी माहिती भाजपचे आमदार महेश लांडगे यांनी दिली.

 

Leave a comment