ahmednagarlive24
Breaking News Updates Of Ahmednagar

वाझेला सेवेत कोणी घेतले, याची चाैकशी कराः हायकोर्ट

सचिन वाझे इतके धोकादायक असतील, तर त्यांना १५ वर्षांनंतर पुन्हा सेवेत घेण्याचा निर्णय कोणी घेतला, हेही सीबीआयने तपासायला हवे.

केवळ याचिकादारापुरता (अनिल देशमुख) तपास न करता सीबीआयने आपल्या तपासाची व्याप्ती वाढवून अन्य कोणालाही सोडता कामा नये’, अशी गंभीर टिप्पणी मुंबई उच्च न्यायालयाने केली.

पोलिस प्रशासन निष्पाप नाही

‘सरकारच्या कार्यकारी प्रमुखांच्या आदेशाप्रमाणे आम्ही काम केले, असे म्हणत पोलिस प्रशासनाचे प्रमुख निष्पाप असल्याचा दावा करू शकत नाहीत.

मंत्र्यांनी सचिन वाझेंना पुन्हा सेवेत घेण्यास कदाचित सांगितले असेलही; परंतु आम्ही केवळ कार्यकारी प्रमुखांच्या आदेशाचे पालन केले असे म्हणत पोलिस प्रशासनाचे प्रमुख आपले कर्तव्य विसरू शकतात का, असा सवाल उच्च न्यायालयानं केला.

देशमुख यांच्यावर एक रुपया घेतल्याचाही उल्लेख नाही

माजी मुंबई पोलिस आयुक्त परमबीर सिंह यांनी देशमुख यांच्यावर केलेल्या भ्रष्टाचाराच्या आरोपांविषयी सीबीआयने उच्च न्यायालयाच्या आदेशाप्रमाणे प्राथमिक चौकशी केल्यानंतर २१ एप्रिल रोजी फिर्याद नोंदविली.

त्याला देशमुख यांनी ज्येष्ठ वकील अॅड. अमित देसाई यांच्यामार्फत फौजदारी रिट याचिकेद्वारे आव्हान दिले आहे. ‘देशमुख यांच्याविरोधात निव्वळ आरोप करण्यात आले.

परमबीर यांच्या पत्रात कोणताही वस्तुस्थितीजन्य पुरावा नव्हता; मात्र आरोप गंभीर असल्याचे लक्षात घेऊन उच्च न्यायालयाच्या आदेशाने सीबीआयला प्राथमिक चौकशीची संधी मिळाली.

या चौकशीनंतरही एफआयआरमध्ये किंवा या याचिकेच्या उत्तरादाखल सीबीआयने केलेल्या प्रतिज्ञापत्रात देशमुख यांनी एकही रुपया घेतल्याचा उल्लेख नाही.

त्यामुळे सीबीआयचा संपूर्ण तपास हा कोणत्याही ठोस पुराव्यांच्या आधारावर नाही. निव्वळ राजकीय हेतू साध्य होण्यासाठी या तपाससंस्थेला कामाला लावण्यात आले आहे’, असा युक्तिवाद देसाई यांनी केला.

पोलिस प्रशासनही जबाबदार

‘आम्ही कोणाचेही नाव घेत नाही;परंतु सचिन वाझेंना १५ वर्षांनंतर पुन्हा सेवेत घेतल्याविषयीच्या मुद्द्यावर भर देऊन सीबीआय संशय व्यक्त करत आहे.

मग त्यांना पुन्हा सेवेत कोणी घेतले? मंत्र्यांनी सांगितले, असे म्हणून पोलिस प्रशासनाचे प्रमुख या प्रश्नी निष्पाप असल्याचा दावा करू शकत नाहीत.

आपले कर्तव्य विसरू शकत नाहीत. तेही तेवढेच जबाबदार आहेत. त्यामुळे सीबीआयने तपासाची व्याप्ती वाढून सूत्रधार कोण याचा शोध घ्यायला हवा’, असे निरीक्षण खंडपीठाने सुनावणीदरम्यान नोंदवले.

तेव्हा ‘आतापर्यंतच्या तपासात सूत्रधार कोण हे निश्चित झाले असून अधिक तपासाची संधी मिळाल्यास सर्वच संबंधितांची भूमिका तपासली जाणार आहे’, अशी माहिती सीबीआयतर्फे अॅड. लेखी यांनी न्यायालयाला दिली.

 

You might also like
2 li