राज्यात कठोर निर्बंध लागू

file photo

मुंबई : राज्य सरकारने कोरोनाच्या तिस-या लाटेच्या भीतीने तसेच डेल्टा प्लस व्हेरिएंटच्या धोक्यामुळे लागू केलेल्या कठोर निर्बंधाची अंमलबजावणी सुरू झाली आहे.

सायंकाळी चार वाजेपर्यंतच दुकाने उघडी राहणार आहेत, तर शनिवार, रविवार वीकएंड लाॅकडाऊन असेल.

निर्बंधांचा विस्तार

राज्य आपत्ती व्यवस्थापन, मदत आणि पुनर्वसन विभागामार्फत ‘ब्रेक द चेन’अंतर्गत लागू असलेल्या निर्बंधांमध्ये विस्तार करताना जमाव व मेळावे,

धार्मिक स्थळे, खासगी प्रशिक्षण वर्ग, कौशल्य केंद्रे, हॉटेल, पर्यटन स्थळासंदर्भातील नियमांची माहिती दिली आहे.

बांधकामावरही पन्नास टक्केच कामगार

मुंबई शहर, उपनगर आणि ठाण्यासह राज्यातील ३३ जिल्ह्यांत स्तर तीनचे निर्बंध लागू झाले आहेत. राज्य सरकारने नव्याने मार्गदर्शक नियमावली जारी केली आहे.

त्यानुसार शंभरपेक्षा जास्त लोकांच्या जमावावर बंदी असेल, तर बांधकामाच्या ठिकाणी क्षमतेच्या ५० टक्क्यांहून अधिक संख्येने काम करता येणार नाही.

मेळावा अथवा संमेलनाचा कालावधी तीन तासांपेक्षा जास्त असणार नाही. या ठिकाणी नियमाचे काटेकोरपणे पालन होत नसल्याचे निदर्शनास आल्यास दंडात्मक कारवाई केली जाईल.

वारंवार नियमावलीचे उल्लंघन पडू शकते महागात

वारंवार नियमावलीचे उल्लंघन करणाऱ्या आस्थापनांना पूर्णपणे बंद केले जाईल. कोरोना आपत्ती असेपर्यंत त्यांना उघडण्याची मुभा मिळणार नाही.

तीन, चार व पाचव्या स्तरातील धार्मिक स्थळे अभ्यागतांसाठी बंद असतील. जेथे लग्नकार्य व अंतिमसंस्कार केले जातील, अशा स्थळी जमावासाठी लागू असलेल्या नियमांची अंमलबजावणी करणे बंधनकारक आहे.

पर्यटनस्थळांच्या परिसरातील सर्व हॉटेल्ससाठी मार्गदर्शक तत्त्वे लागू असतील. संबंधित पर्यटनस्थळ स्तर पाचमध्ये येत असेल तर ई-पासशिवाय पर्यटकांना प्रवेश दिला जाणार नाही.

पर्यटक स्तर पाचमधून येत असतील, तर त्यांना एका आठवड्यासाठी विलगीकरणात राहावे लागेल. पाहुण्यांना प्रवेशासाठी सर्व स्तरातील हॉटेल्स उघडी ठेवण्याची परवानगी असेल.

क्षमतेच्या अटीवर हॉटेलमधील उपाहारगृहे त्या ठिकाणी राहणाऱ्या पाहुण्यांसाठी सुरू ठेवण्यात येतील.