पिंपरी-चिंचवडमध्ये गेल्या काही दिवसांपासून करोनारुग्णांची संख्या मोठ्या प्रमाणात वाढू लागल्याने खबरदारीचा उपाय म्हणून नेहरूनगर येथील अण्णासाहेब मगर क्रीडा संकुलात जम्बो रुग्णालय १५ जानेवारीपासून आठशे खाटांसह पुन्हा सुरू करण्यात येणार आहे.

यामध्ये सहाशे खाटा ऑक्सिजनयुक्त आणि दोनशे आयसीयू खाटा उपलब्ध राहणार आहेत. करोना संसर्गाच्या पहिल्या लाटेत जुलै २०२० पुणे महानगर प्रदेश विकास प्राधिकरणामार्फत नेहरूनगर येथील अण्णासाहेब मगर क्रीडा संकुलात जम्बो रुग्णालय उभारण्यात होते.

पहिल्या लाटेत करोनाबाधितांची संख्या कमी झाल्याने जम्बो रुग्णालय १६ जानेवारी २०२१ रोजी बंद करण्यात आले. तिसऱ्या लाट येण्याच्या दाट शक्यतेच्या पार्श्वभूमीवर महापालिका आयुक्त राजेश पाटील यांनी नुकतीच आढावा बैठक घेतली. या बैठकीत जम्बो रुग्णालय १५ जानेवारीपासून पुन्हा सुरू करण्याचा निर्णय घेण्यात आला आहे.

Advertisement

रुग्णालयात खाटांची संख्या आठशे इतकीच ठेवण्यात येणार आहे. त्यामध्ये सहाशे खाटा ऑक्सिजनयुक्त आणि दोनशे ‘आयसीयू’सज्ज खाटा असणार आहेत. मेडब्रोज हेल्थकेअर डायग्नोस्टिक सेंटर यांच्याकडून जम्बो रुग्णालया साठी लागणारे मनुष्यबळ उपलब्ध करून घेतले जाणार आहे.

१५ जानेवारी ते १४ मार्च २०२२ या दोन महिने कालावधीकरिता दोन्ही प्रकारच्या खाटांसाठी एकूण दहा कोटी १४ लाख रुपये खर्च होणार आहे. ऑक्सिजनयुक्त खाटेचा प्रतिदिन दर एक हजार ४०४ रुपये आणि आयसीयू खाटेचा चार हजार ३८५ रुपये असणार आहे.

करोनाच्या तिसऱ्या लाटेच्या पार्श्वभूमीवर महापालिका प्रशासनाने काही महत्त्वाचे निर्णय घेतले आहेत. त्याअंतर्गत शहरातील खासगी रुग्णालयांतील ‘आयसीयू’मधील गंभीर रुग्णाला थेट महापालिकेच्या ‘आयसीयू’मध्ये दाखल करून घेतले जाणार नाही, या धोरणात्मक निर्णयाचा समावेश आहे.

Advertisement

जम्बो कोव्हिड सेंटर व ऑटो क्लस्टर सेंटरमध्ये रुग्णांची थेट भरती करण्यात येणार नाही. त्यासाठी महापालिकेच्या वरील सर्व रुग्णालयामधून संदर्भित केलेली शिफारस आवश्यक आहे. महापालिका हद्दीमधील रुग्णांना रुग्णालयामध्ये प्राधान्याने भरती केले जाईल, असे स्पष्ट करण्यात आले.

पालिकेचे कोरोना सेंटर ओमायक्रॉनचा प्रभाव पालिका क्षेत्रामध्ये दिसून येत आहे. तिसरी लाट थोपविण्यासाठी महापालिकेमार्फत सात रुग्णालये सज्ज आहेत. गरजेनुसार कोव्हिड केअर सेंटर (सीसीसी) सुरू करण्याबाबत कार्यवाही चालू आहे. त्यानुसार घरकुल, चिखली येथील सेंटर सुरू करण्यात आले आहे.

टप्प्याटप्प्याने इतर कोव्हिड केअर सेंटर सुरू करण्यात येतील. कोव्हिडची लक्षणे आढळल्यास त्वरित चाचणी करून घ्यावी. पालिकेच्या आठ झोनल रुग्णालयांमध्ये (भोसरी, सांगवी, वायसीएम, जिजामाता, थेरगाव, आकुर्डी, तालेरा आणि यमुनानगर) चाचणीची सोय मोफत करण्यात आलेली आहे.

Advertisement