महसूल दिनाच्या पार्श्वभूमीवर राज्यातील जनतेला महसूल विभागाच्या आणखी तीन नवीन ऑनलाईन सुविधा उपलब्ध होणार आहे. यामध्ये आतापर्यंत डिजिटल स्वाक्षरीत सातबारा उपलब्ध करून देण्यात आला असून, यापुढे डिजिटल स्वाक्षरीत फेरफार, नवीन सातबारा आणि मिळकत पत्रकांचे फेरफारदेखील ऑनलाईन पद्धतीने उपलब्ध करून देण्यात येणार आहेत.

पवार, थोरात यांच्या हस्ते आज प्रारंभ

या तिन्ही नवीन सुविधांचा प्रारंभ महसूल मंत्री बाळासाहेब थोरात व उपमुख्यमंत्री अजित पवार यांच्या हस्ते करण्यात येणार आहे. दैनंदिन कामासाठी लागणारा सातबारा, आठ अ चा उतारा, फेरफार, प्रॉपर्टी कार्ड फेरफार सहज व विना हेलपाट्याशिवाय मिळण्यासाठी शासनाने डिजिटल सातबारा प्रकल्प सुरू केला.

राज्यात गेल्या दीड-दोन वर्षांपासून ऑनलाईन व डिजिटल सातबारा दैनंदिन व्यवहारात वापरण्यात येत असून, दिवसाला तब्बल एक लाख डिजिटल स्वाक्षरीत सातबारे वापरले जात आहेत.

Advertisement

डिजिटल फेरफार मिळणार घरबसल्या

उद्यापासून डिजिटल स्वाक्षरीत सातबा-यासोबतच डिजिटल स्वाक्षरीत फेरफारदेखील नागरिकांना घर बसल्या उपलब्ध होणार असल्याचे या प्रकल्पाचे राज्याचे समन्वयक रामदास जगताप यांनी सांगितले. राज्यात २०१५ -१६ पासून ऑनलाईन फेरफार मोहीम सुरू करण्यात आली.

यात आतापर्यंत राज्यातील एक लाख ३६ हजार फेरफार ऑनलाईन करण्यात आले असून, एक कोटी १८ हजार फेरफार डिजिटल स्वाक्षरीत उपलब्ध आहेत. आता हे सर्व फेरफार डिजिटल स्वाक्षरीत ऑनलाईन उपलब्ध करून देण्यात येणार आहेत.

राज्यात आज पासून नवीन सातबारा

राज्यातील सातबा-यात तब्बल पन्नास वर्षानंतर बदल करण्यात आले आहे. नवीन सातबारा साधा, सहज समजेल व सुटसुटीत संगणकीय सातबा-याच्या गरजा व सर्वसामान्य नागरिकांना सहज समजेल अशा भाषेत हा सातबारा तयार केला आहे.

Advertisement

राज्यातील सर्व दोन कोटी २५ लाख सातबारे नवीन बदलासह तयार झाले असून, नागरिकांना एक ऑगस्टपासून नवीन सातबारा उपलब्ध होणार आहे. याशिवाय मिळकत पत्रकांचे फेरफार ऑनलाईन मिळणार आहेत.

 

Advertisement